Calma

Ara che bela piera, come un scagno

speta, son in alto, pianto el calcagno

Verde, poco vento, se movi le foie

vose de marì che ghe ziga a la moie

aria tiepiduza, ombre gioga 'torno

altro che là zo, afa, sol, un forno

devo solo alzarme e andar su

pian a pian verso el blu

basta rifleter tuto in una volta! Calma!

Eco, a stancar el fisico, la mente se disarma

ciolendoghe l'energia che la dopra per pensar

me ritrovo calma a caminar...

Nuvolete

Basta una parola e drio ghe rodola le altre

quasi senza fadiga a volte, passa ore per certe

le riva chissà de dove... chissà se xe un posto?

Dove le cova o fermenta come el mosto?

Le parti da una sensazion, un'impression

che atira letere e forsi anche idee, no so...

e pian pian le cressi sentindose in preson

le zerca aria, le speta de volar via, no so...

le brama de meterse in fila, precisa, ordinada

in riga, in sequenza, scorevole ritmada

alora le te fa sentir voia de scriver

e te se meti a zercar de veder

se quel doloroso piazer, de far, disemo poesia

ga un perché per stuzigarte el zervel, o xe solo folia.

E po' i te disi "te buti zo facile ah le parolete!"

Sì, provighe ti, a ciapar nuvolete!